Në ambientet e Medresesë “Isa Beu” paralelja e vajzave në Tetovë u realizua aktiviteti letrar “Një takim me poeten Sadije Aliti”. “Çdo lexues, kur lexon, e lexon vetveten.Vepra e shkrimtarit është vetëm një lloj mjeti optik që i ofrohet lexuesit, duke i ofruar që ta shohë atë që, pa librin, ndoshta nuk do ta kishte parë kurrë te vetvetja” thënie nga Marcel Proust, shkrimtar francez.
“Është nder për ne që në mesin tonë të kemi femra që shkruajnë, që botojnë libra dhe janë aktive në jetën letrare duke e pasuaruar edhe më shumë letërsinë shqipe”-theksoi moderatorja e aktivitetit Amra Memedi.
Në kuadër të aktivitetit letrar takim me shkrimtaren Sadije Aliti, u bashkëbisedua me autoren dhe u lexuan krijimet letrare të nxënëseve të Medresesë “Isa Beu”, paralelet e vajzave në Tetovë në një orë letrare të përbashkët. Drejtoresha e shkollës, Barije Shabani, në fjalën përshëndetëse theksoi: ” Ndihemi shumë të nderuara dhe të vlerësuara që ju sot jeni në mesin tonë. Shkrimtarët bëjnë një punë që nuk mund ta bëjë secili, ju shkruani e keni tituj të botuar, keni një aftësi e dhunti që ua ka falur Zoti, keni aftësi shkrimi, keni lapsin e shkrimin ku shprehni ndjenjat e emocionet tua, duhet të përshkruani e të nxjerrni në letër ngjarje e emocione nga rastet e jetës së të tjerëve që të botohen e të lexohen”.
Për krijimtarinë letrare të poetes Sadije Aliti, foli Behare Neziri. “Leximi i poezisë është një akt i zbulimit dhe gjurmimit të domethënies së ndjenjave, si një akt i ndjenjës shpirtërore, që në shumicën e rasteve, ky akt shndërrohet në vetëdije për ta trazuar jetën si lum i gurrës që e gjen rrugën e vetë, për t’u derdhur në dete e, më pas aty ku përfundojnë ngjyrat e shenjat e një poeti, apo si në këtë rast poetja Aliti”-tha Behare Neziri.
Autorja Sadije Aliti theksoi: “Është kënaqësi që të bashkëbisedojmë më nxënëset, profesoreshat e kësaj shkolle, sepse mësimdhënësit që punojnë në shkolla kënë një mision fisnik, kanë një obligim moral për të ndërtuar ardhmërinë, së bashku me krijueset e reja nga kjo shkollë të bashkëbisedojmë për krijimin letrar”.
Njëherit për bibliotekën e shkollës u dhuruan libra të autores. Motoja: “Dhuro një libër e krijo një miqësi”. Miqësia me libra çdo herë është e nevojshme, është e përjetshme!
Disa poezi të autores lexuan nxënëset e Medresesë. U lexuan edhe krijime letrare shumë të bukura, poezi lexuan nxënëset: Ezana Qamili, Amra Memedi, Rufije Sulejmani, Sara Mustafa, Fatime Aliu, Anesa Ramadani, Hatixhe Kadrija, Ajshe Shabani, Remzije Nuhiu, të përgatitura nga profesoresha e gjuhës shqipe dhe udhëheqëse e grupit letrar, Syndis Zeqiri.
Ishte kënaqësi shoqërimi i përbashkët në këtë takim letrar.
Sh. Sinani
